أمثال أزخينيّة بحرف الباء

[فؤاد زاديكه]

سبق و أن نشرت بعض الأمثال الآزخيّة التي جاءت على السجع و القافية و كنت جمعت أكبر عدد ممكن من هذه الأمثال في مخطوط سأقوم بطباعته و نشره في وقت لاحق و المخطوط اسمه( المُنتخَب من جداول آزخ الصافية فيما ذهب من الأمثال على السّجع و القافية) نشرت أمثال بحرف الألف و اليوم سأقوم بنشر الأمثال بحرف الباء دون شروحات لها آمل أن تكون بذلك متعة لمحبّي لهجة آزخ و تراثها و شكرا لمتابعتكم و لتشجيعكم أحبتي.

• البَلا چاخِلْ يِجي, سِتِرْ ربّك ارتِجي
• الباعْ ظاعْ, و الشترى أرَى
• بارِمّا حمار يِطِمّا
• بابِقّا حمار يتقّا
• البِربارة ترِدّ البِزِر لِكوارة
• بَقبوكات الرّبيعْ هُوّي يِخْرا و إنتْ تبيعْ
• پِروط دِينِه خُوَا فِروط
• پِزوكه راحت الصّرايه و رفعِتْ الصّبعايِه
• كما بير المكصور أشقَدْ لَتْحِط فيو يغور
• بَلا كَزا مَزا
• بِهنان القُطّ شَتنيسْ ميْحِطّ
• بين حانة و مانة ظَيّعنا الحانة
• بعد العَداوه, حَلاوه
• پاشا و طَماشا
• بابي التّعبان ميروح عالرّحّان
• بَرَه بَيْصا ساسهِ و سيسين بَيظَه
• بَيت ايسير مِنّك مِيت بَيت
• باب اشْقَعْ و باب ارْقَعْ
• البَرطيل يِقتِل قَتيلْ
• باب ليجيلك مِنّو الرّيح, سِدّو و اسْتَريحْ
• البِطلان, حِطْ عينِك عالجّيران
• پَرضون مسيو جَرضون, حَظِّك مو هون
• بيتْ الوِحده مَعمور و التانية مسطور و التالته خَرابْ و الرّابعة محَمّلْ عالدّوابْ
• بِخشْ ليزِعِجِكْ هَوَهو, سَكِّرو بَلَهو
• البِطِر عالنِّعمه, يظَيِّع الطّعمِه
• بَيتي جَنّتي
• بَناتْ, سِكَّرْ نباتْ
• بَلاش ما يِنحاشْ
• بين الدّام و الدِّنحْ, يِجي شِي كما المِلحْ
• بَيتي و بيتاتي, مغَطّي عِيوباتي